АНУ-Ираны хурцадмал байдлаас мөнгө хийж буй нэг ETF: Газрын тос, эрчим хүчний хувьцаанаас ч өндөр өсөлттэй болжээ
Дайн, геополитикийн хурцадмал байдал зах зээлийн зарим салбарт хүчтэй цохилт өгдөг бол нөгөөд нь ашиг авчирдаг. Тэгвэл олны анхааралд төдийлөн өртдөггүй Breakwave Tanker Shipping ETF (BWET) энэ жил 600 гаруй хувиар өсөж, түүхий нефть болон эрчим хүчний хувьцаануудыг хол давжээ.
АНУ-Иран хоорондын хурцадмал байдал нэмэгдэж, дэлхийн эрчим хүчний нийлүүлэлтийн эрсдэл өссөнөөр тээвэр, ялангуяа газрын тос тээврийн зах зээлд хүчтэй савлагаа үүсээд байна. Ийм нөхцөлд нефтийн үнэ өөрөө өсөхөөс гадна түүнийг зөөвөрлөдөг танкерийн зах зээл ч илүү их ашиг хүртэх хандлагатай байдаг.
BWET-ийн огцом өсөлт нь хөрөнгө оруулагчид зөвхөн газрын тосны үнэ дээр бус, нийлүүлэлтийн гинжин хэлхээний “араа механизм” болох тээврийн салбар дээр ч бооцоо тавьж эхэлснийг харуулж байна. Өөрөөр хэлбэл, нефть олборлогч компаниудыг бус, нефтийг далайгаар зөөх танкерийн бизнесийг дагасан стратеги энэ удаа илүү ашигтай гарчээ.
Зах зээлийн мэргэжилтнүүдийн хувьд энэ бол эрчим хүчний зах зээл дэх шууд бус, гэхдээ өндөр хөшүүрэгтэй тоглолтын нэг жишээ. Газрын тосны ханш өсөхөөс илүүтэй танкерийн тээврийн тариф, захиалгын ачаалал, тээврийн маршрут дахь эрсдэл нэмэгдэх нь BWET шиг биржийн сангийн үнэ цэнийг илүү огцом хөдөлгөж байна.
Ингэснээр BWET нь энэ жилийн хамгийн гайхалтай өсөлт үзүүлсэн ETF-үүдийн нэг болж, геополитикийн эрсдэл дээр суурилсан “нууц ашигт” хөрөнгө оруулалтын шинэ жишээ болжээ.
