Starlink дахин үнээ нэмж, хэрэглэгчдийг шахлаа
Starlink АНУ дахь хиймэл дагуулын интернетийн бүх гол багцынхаа үнийг өсгөв. Хамгийн хямд 100Mbps Residential багц $50-оос $55 болж, 200Mbps багц $80-оос $85 болсон байна. Харин Residential Max төлөвлөгөө $120-оос $130 хүрчээ.
Үнийн өсөлт зөвхөн үндсэн багцуудаар тогтохгүй. Түр зогсоох боломжтой Standby Mode сарын $5-оос $10 болж хоёр дахин нэмэгдэв. Мөн Roam үйлчилгээ ч үнэтэй болсон бөгөөд 100GB багц $50-оос $55 болсон байна.
Энэ өсөлт Starlink-ийн хэрэглэгчдэд шууд нөлөөлөхөөс гадна зах зээл дээрх өрсөлдөөнд ч анхаарал татаж байна. Хиймэл дагуулын интернэт одоо илүү өргөн хүрээнд ашиглагдаж байгаа ч үнэ өсөх тусам хэрэглэгчид илүү хямд хувилбар хайж магадгүй. Starlink-ийн хувьд энэ нь орлогоо нэмэгдүүлэх алхам ч хэрэглэгчийн сэтгэл ханамжийг шалгах шинэ сорилт болж байна.
