Нарны салхи сарны хөрсөнд ус үүсгэж болохыг NASA тогтоолоо
NASA-ийн шинэ судалгаагаар нарны салхи сарны хөрсөнд шууд ус үүсгэх боломжтойг тогтоожээ. Уг судалгааг сарыг дуурайлгасан лабораторийн орчинд хийсэн бөгөөд нарны салхинаас гарах устөрөгчийн ион сарны хөрсөнд агуулагддаг хүчилтөрөгчтэй нэгдэн ус (H₂O) болон гидроксил (OH) үүсгэж байгааг илрүүлсэн байна.
Сарны хөрсөнд силикат зэрэг хүчилтөрөгч агуулсан эрдсүүд элбэг байдгийг ашиглан судлаачид нарны салхины нөлөөг туршжээ. Ингэхдээ нарны салхины орчинд төстэй нөхцөл бүрдүүлж, устөрөгчийн ионыг сарны хөрсийг төлөөлөх дээж рүү чиглүүлсэн байна. Дараа нь шинжилгээ хийхэд ус болон гидроксил үүссэн нь батлагдсан байна.
Энэхүү нээлт нь ирээдүйн сарны судалгаа болон суурин байгуулахад чухал нөлөө үзүүлнэ гэж үзэж байна. Учир нь сансрын нислэгийн гол хязгаарлагч болдог усыг сарны хөрснөөс шууд гарган авах боломжтой болох нь тогтоогдсон нь томоохон дэвшил юм. Мөн энэ нь сарны гадарга дээр ус үүсэх олон эх үүсвэр байгааг батлах нэг нотолгоо болж байна.
NASA-ийн судлаачдын үзэж буйгаар сарны хөрсөнд хуримтлагдсан устөрөгч, хүчилтөрөгчийн урвал нь зөвхөн сартай хязгаарлагдахгүй бөгөөд нарны салхинд өртдөг бусад агаар мандалгүй биетүүд дээр ч ийм процесс явагдаж болох юм.
