АНУ БНХАУ-ын 50 гаруй компанийг хар жагсаалтад орууллаа
Өчигдөр АНУ-ын Худалдааны яамнаас БНХАУ-ын 50 гаруй ААН-ийг экспортын хар жагсаалтад орууллаа. Энэ нь Бээжингийн хиймэл оюун ухаан (AI) болон өндөр хүчин чадалтай квант технологийн хөгжлийг сааруулах зорилготой юм.
Мөн эдгээр компанийг АНУ-ын үндэсний аюулгүй байдал, гадаад бодлогын ашиг сонирхолд харш үйл ажиллагаа явуулсан гэж үзэж байна. Учир нь эдгээр технологи нь их хэмжээний өгөгдлийг өндөр хурдаар боловсруулах хүчин чадалтай тул БНХАУ-ын цэрэг, батлан хамгаалахын салбарт чухал ач холбогдолтой гэж АНУ үзэж байна.
Тиймээс БНХАУ руу өндөр хүчин чадалтай хагас дамжуулагч чипүүдийг хууль бусаар гаргаж буй сувгуудыг илрүүлэх, Nvidia болон AMD-ийн үйлдвэрлэсэн чипүүдийн хууль бус экспортыг хянах ажиллагааг эрчимжүүлэхээр болжээ.
Хар жагсаалтад багтсан компаниуд:
- Хиймэл оюун ухаан, супер компьютер, өндөр хүчин чадалтай чип хөгжүүлдэг БНХАУ-ын компаниуд
- АНУ-аас гаралтай технологийг БНХАУ-ын армийн шинэчлэлд ашигласан 27 компани
- Huawei болон түүний чип үйлдвэрлэгч HiSilicon зэрэг өмнө нь хоригт орсон компаниудад нийлүүлэлт хийсэн 2 компани
- БНХАУ-ын квант технологийн хөгжлийг дэмжсэн 7 компани
- 2023 онд Байдены засаг захиргааны хоригт орсон Inspur группын 6 охин компани багтжээ.
