Tesla компанийн ашиг 71 хувиар буурчээ
2025 оны эхний улирлын санхүүгийн үзүүлэлтээ танилцуулсан Tesla компанийн цэвэр ашиг өмнөх оны мөн үеэс 71 хувиар буурч, 409 сая ам.долларт хүрсэн байна. Мөн нийт орлого нь 9 хувиар багасч, 19.3 тэрбум ам.доллар болсон нь шинжээчдийн таамаглаж байсан 21.1 тэрбум ам.доллараас доогуур үзүүлэлт байв.
Компанийн автомашины борлуулалт 20 хувиар буурсан бөгөөд энэ нь нийлүүлэлтийн хүндрэл, шинэ загваруудын хүлээлт, борлуулалтын дундаж үнэ буурсантай холбоотой гэж шинжээчид үзэж байна. Түүнчлэн Tesla-ийн гүйцэтгэх захирал Элон Маскийн АНУ-ын Ерөнхийлөгч Дональд Трампын засаг захиргаанд ажиллаж буй нь компанийн нэр хүндэд сөргөөр нөлөөлж, хэрэглэгчид болон хөрөнгө оруулагчдын дунд итгэл сулраад байгаа аж.
Гэсэн ч Элон Маск ирэх сараас эхлэн засгийн газрын ажил үүргээ багасгаж, Tesla-д илүү анхаарал хандуулахаа мэдэгдсэн. Үүний зэрэгцээ компани 2025 оны эхний хагаст хямд үнэтэй шинэ загварууд болон Техас мужид автомат жолоодлоготой Robotaxi үйлчилгээг нэвтрүүлэхээр зорьж байна.
Tesla-ийн хувьцааны үнэ мэдээ нийтлэгдсэний дараа бага зэрэг өссөн ч зах зээлийн итгэл сэргэх эсэх нь цаашдын үйл ажиллагаанаас шалтгаалах төлөвтэй байна.
