SEC токенжуулсан хувьцааны замыг нээж, 24/7 арилжаанд ойртлоо
АНУ-ын Үнэт цаас, биржийн хороо токенжуулсан хувьцааг турших, нэвтрүүлэх боломжийг өргөжүүлэх “Innovation Exemption” буюу инновацийн чөлөөлөлтийг хэрэгжүүлэхээр боллоо. Энэ шийдвэр нь хөрөнгийн зах зээл дижитал хэлбэрт шилжих дараагийн том алхам гэж үзэгдэж байна.
Токенжуулсан хувьцаа гэдэг нь компанийн энгийн хувьцааны эрхийг блокчэйн дээр суурилсан дижитал токен болгон хувиргасан бүтээгдэхүүн юм. Ингэснээр арилжаа илүү хурдан, зардал багатай, цаашлаад уламжлалт биржийн цагийн хязгаараас гадуур явагдах боломжтой гэж зах зээлийн оролцогчид харж байна.
Энэхүү шийдвэр нь крипто зах зээлийн зохицуулалтын хүрээг тодорхой болгох Clarity Act хуулийн төсөл Сенатын түвшинд урагшлах боломжгүй болсноос хоёр хоногийн дараа гарч буй нь анхаарал татаж байна. Өөрөөр хэлбэл, хууль тогтоомжийн түвшинд тодорхойгүй байдал үргэлжилж байгаа ч зохицуулагчид шинэлэг санхүүгийн бүтээгдэхүүнд илүү уян хатан хандах дохио өглөө.
Хэрэв энэ чиг хандлага үргэлжилбэл хувьцааны зах зээл 24/7 арилжаанд улам ойртож, хөрөнгө оруулагчдын хувьд зах зээлийн дүрэм бүрэн өөрчлөгдөх боломжтой.
