Оцон шувуунаас өөр амьтан амьдардаггүй аралд Трамп импортын татвар оноожээ
Лхагва гарагт Трампын засаг захиргаа АНУ-ын бараа бүтээгдэхүүнд импортын татвар оноодог дэлхийн улс бүхний эсрэг ижил хариу арга хэмжээ авч байгаагаа зарласан билээ.
Гэтэл Трампын худалдааны дайн Антарктидын ойролцоо оршдог, хүн оршин суудаггүй, зөвхөн оцон шувуунууд амьдардаг жижиг арлыг ялгаагүй чиглэсэн байна.
Херд болон Макдональд арлууд нь Австралийн баруун эргээс усаар хоёр долоо хоног аялж хүрдэг алслагдсан газар нутаг юм.
Эдгээр арлуудад ганц ч хүн амьдардаггүй бөгөөд хамгийн сүүлд 10 орчим жилийн өмнө хүн хөл тавьж байжээ.
Гэтэл Трампын засаг захиргаа эдгээр арлуудад 10 хувийн импортын татвар оноосон байна.
Австралийн ерөнхий сайд Энтони Албаниз энэ талаар өнөөдөр өглөө “Дэлхийн хаана ч тайван амьдрах аргагүй болжээ” хэмээн гайхан хэлжээ.
Херд болон Макдональд арлууд нь Австралийн алслагдсан газар нутагт тооцогддог юм байна. Цагаан ордныхон эдгээрийг Австралиас тусдаа улс мэт үзсэн нь гайхмаар тохиолдол юм.
Дээрх арлуудаас гадна Австралид харьяалагддаг Кокосын арлууд, Крисмас арал, Норфолк арал зэрэг бусад алслагдсан нутаг дэвсгэрүүд Трампын жагсаалтад багтжээ.
Эдгээрээс Сидней хотоос зүүн хойд зүгт 1,600 км зайд оршдог, 2,188 хүн оршин суудаг Норфолк арал эх газраасаа ч өндөр буюу 29 хувийн татвараар шийтгүүлсэн нь сонирхолтой байгаа юм.
2023 онд тус арлаас $655,000-ын дүнтэй бараа АНУ-д экспортолж байжээ.
Үүний ихэнх нь буюу $413,000 нь арьсан гутлын экспорт байсан байна.
“Норфолк арал 29 хувийн татвартай болжээ. АНУ-ын аварга эдийн засагтай харьцуулахад тус арлыг өрсөлдөгч гэж үзэхэд хэцүү юм. Гэхдээ энэ нь дэлхийн хаа ч амар амгалан байх боломжгүй болсныг харуулж байна” гэж Албаниз хэлжээ.
