Үндэсний 12 бөхөөс хориглосон бодис илэрсэн талаар Монголын допингийн эсрэг үндэсний байгууллагаас мэдээллээ. Тодруулбал, Д.Отгонбаяр, Д.Оргилох, Г.Мөнхбаяр, А.Баяртогтох, Г.Пүрэвбаатар, Ч.Бямбадорж, Б.Ганзолбоо, Б.Бадамдорж, Э.Мөнхболд, Б.Цэрэнсумъяа, Б.Хаш-Эрдэнэ, Б.Буяндорж нараас допинг илэрчээ. Харин Б.Лхагварагчаагаа аналитик бус /шинжилгээний бус/ зөрчил илэрсэн байна. Эдгээр 13 бөхөөс долоод нь шийтгэл ногдуулсан бөгөөд таван бөхийн шинжилгээний асуудал дуусаагүй гэдгийг албаныхан мэдээллээ.
Харин Дархан аварга Н.Батсуурь, аварга О.Хангай, П.Бүрэнтөгс болон улсын арслан Б.Орхонбаяр, Ц.Бямба-Отгон, улсын харцага Б.Зоригтбаатар, аймгийн хурц арслан Н.Өсөхбаяр нарын бөхчүүд допингийн шинжилгээнд бүдрээгүй байна.
Монгол Улсын Засгийн газрын 2022 оны аравдугаар сарын 19-ний өдрийн 376 дугаар тогтоолоор баталсан Допингийн эсрэг үндэсний дүрмийн дагуу үндэсний бөхийн тамирчдаас допингийн хяналтын зорилгоор тэмцээний болон тэмцээний бус үеийн шинжилгээнд биологийн сорьц цуглуулан авч, Дэлхийн допингийн эсрэг агентлагийн итгэмжлэгдсэн ХБНГУ, БНСУ, Швейцарь улсын лабораторт хүргүүлэн шинжлүүлжээ.
Допингийн эсрэг үндэсний дүрмийн дагуу Монголын допингийн эсрэг үндэсний байгууллагаас допингийн шинжилгээнд зөрчил илэрсэн тамирчдад дүрмийн дагуу дараах эрхийг
ханган ажиллаж байна.
• Лабораторийн шинжилгээний хуудас, А сорьцын баримт бичгийн багцыг нэмэлтээр авах
• В сорьцыг шинжлүүлэх
• Тайлбар өгөх
• Допингийн эсрэг үндэсний дүрмийн хүрээнд хамтран ажиллах нөхцөлийг бүрдүүлэхийг зөвлөж байна.
