Forbes: Орос тэрбумтнуудын тоогоор 5 дугаарт эрэмбэлэгджээ

Сүүлийн нэг жилийн хугацаанд Орост ам.долларын тэрбумтнуудын тоо нэмэгдэж, тэдний нийт хөрөнгийн хэмжээ өссөн тухай Америкийн “Forbes” мэдэгджээ.

Тэрбумтнуудын шинэчлэгдсэн жагсаалтад 3028 хүн багтжээ. Долларын тэрбумтнуудын тоогоор АНУ (902), Хятад (516), Энэтхэг (205), Герман (171) улсууд тэргүүлсэн бол ОХУ тавдугаарт бичигдсэн байна.

Forbes сэтгүүлийн мэдээлснээр, ОХУ-д ам.долларын тэрбумтнуудын тоо нэг жилийн дотор  120-оос 140 болж нэмэгдсэн бол тэдний нийт хөрөнгийн хэмжээ 537 тэрбум ам.доллароос 580 тэрбум болж өсжээ. Оросын хамгийн баян хүнээр “Лукойл” компанийг үүсгэн байгуулагч, 28.7 тэрбум ам.доллароор хэмжигдэх хөрөнгөтэй Вагит Алекперов хоёр дахь жилдээ тодорчээ.