Мбаппе Роналдутай адил домог болж чадах уу?
“Реал Мадрид” клубийн супер од Килиан Мбаппе бүх цаг үеийн мэргэн бууч Криштиану Роналдутай адил клубийнхээ домог болж чадна гэж дасгалжуулагч Карло Анчелотти мэдэгдлээ.
Роналдуг багаасаа шүтэн биширдэг байсан Мбаппе өнгөрсөн зун “Пари Сен-Жермен”-ээс “Реал”-д шилжин ирсэн эхний улиралдаа Португалын довтлогчийн оруулж байсантай тэнцүү тооны буюу 33 гоол оруулсан байна.
К.Анчелотти хэвлэлийн хурлын үеэр хэлэхдээ, Роналдугийн “Реал Мадрид”-д байхдаа гаргасан амжилтад Мбаппе хүрч чадна гэж бодож байна гэжээ. Өөрөөр хэлбэл, Криштиану Роналду шиг “Реал Мадрид”-ын домог болно гэсэн үг гэж тэрбээр тодотгон хэлсэн байна.
Роналду 2009 онд “Манчестер Юнайтед”-аас “Реал”-д ирж, 2018 онд клубээс явах үедээ нийт 450 гоол оруулсан юм. Өдгөө Саудын Арабын “Аль-Наср” клубт тоглож буй 40 настай тэрбээр “Реал Мадрид”-д ирсэн эхний улиралдаа 35 тоглолтод 33 гоол оруулж байжээ.
26 настай Мбаппе өнгөрсөн бямба гарагт Ла Лигт “Леганес”-тэй тоглохдоо дубль хийж, Роналдугийн амжилттай эн зэрэгцэх нь “онцгой сайхан санагдаж байна” хэмээн сэтгэгдлээ хуваалцсан байна. Мбаппе “Реал Мадрид” телевизэд ярилцлага өгөхдөө, Роналду “Реал Мадрид”-ын хэн бэ гэдгийг бүгд мэднэ, бид хоёр хоорондоо ярилцаж, тэр надад маш их зөвлөгөө өгдөг гэжээ.
Реалчууд энэ улиралд гурван тэмцээнд оролцож байгаа тул Мбаппед оноогоо өсгөх хангалттай цаг хугацаа бий. Мягмар гарагт К.Анчелоттигийн удирдсан баг Испанийн эзэн хааны цомын хагас шигшээ тоглолтод “Реал Сосьедад”-той тоглож, 1:0-ээр хожсон байна. “Реал Мадрид” энэ тэмцээнд түрүүлбэл К.Анчелотти уг цомыг гурван удаа өргөсөн анхны дасгалжуулагч болно.
