Тайланд улс жуулчдын визгүй зорчих хугацааг 30 хоног болгон багасгана
Тайланд улс гадаад жуулчдын визгүй зорчих хугацааг хоёр дахин багасгаж, 30 хоногоор хязгаарлахаар төлөвлөж буй гэнэ. Зүүн Өмнөд Азийн тус орны визийн зөөлөн бодлогыг ашиглан хууль бус бизнес эрхэлж буй гадаад иргэдийн тоо нэмэгдсэн тул ийм арга хэмжээ авч магадгүй байгаа аж.
2024 оны долоодугаар сараас хойш Тайланд дэлхийн 93 орны паспорт эзэмшигчдийг 60-аас дээшгүй хоногоор визгүй зорчихыг зөвшөөрөөд байв. Тэгвэл үүнийг дуусгавар болгож, 30 хоног болгон багасгах төлөвлөгөөг тус улсын яамд зарчмын хувьд тохиролцсоныг даваа гарагт Тайландын хэвлэлүүд мэдээлжээ.
Тус улсад хууль бусаар ажил, бизнес эрхэлж, мөн албан ёсны гэрээгүйгээр орон сууц түрээсэлж амьдардаг гадаад иргэдийн тоо эрс нэмэгдсэн нь урт хугацааны визийн хөнгөлөлтийн бодлоготой тодорхой хэмжээнд холбоотой талаар Тайландын аялал жуулчлалын агентлагуудын болон зочид буудлуудын холбооноос гомдол гаргасныг “Bangkok Post” мэдээлсэн байна.
Тус улсын Засгийн газар энэ онд хүлээн авах жуулчдын тоог 40 сая хүргэж, 2019 онд тогтоосон дээд үзүүлэлтээ эвдэхийг зорьж байгаа юм. Нэгдүгээр сараас гуравдугаар сарын 16-ны хооронд Тайланд улс 8.3 сая жуулчин хүлээн авсан нь өмнөх оны мөн үеэс 3.9 хувь өссөн үзүүлэлт болж байгаа аж.
