Жон Кеннедиг хөнөөсөнтэй холбогдох төрийн нууц материал дэлгэгдэв
Трампийн засаг захиргаа ерөнхийлөгч агсан Жон Ф.Кеннедигийн аллагатай холбоотой олон мянган баримт бичиг болох нууц материалыг дэлгэлээ. Энэ нь Трамп нэгдүгээр сард тангараг өргөснийхөө дараа ерөнхийлөгч агсны амь насыг хөнөөсөн хэргийн талаарх засварлагдаагүй баримт бичгийг олон нийтэд ил болгох зарлиг буулгасны дагуу АНУ-ын үндэсний архивын цахим хуудас дээр нийтэлсэн байна.
Үндэсний архивын цахим хуудас дээр 31 мянга гаруй хуудас бүхий 1.1 мянган файл нийтлэгджээ. Уг нууц мэдээлэл дэлгэгдсэний дараа шинжээчдийн баг бүрдэж, бүх файлыг судалж эхлээд байна.
Жон Ф.Кеннеди 1963 оны арваннэгдүгээр сард Техасын Даллас хотод айлчилж байх үеэрээ буудуулсан гэдгийг дэлхий нийт мэднэ. Гэсэн хэдий ч өнөөг хүртэл түүний үхлийн талаарх баримт бичиг, мэдээллийг АНУ-ын үндэсний аюулгүй байдал, төрийн нууцад хамруулж байв. Улмаар ерөнхийлөгч агсан Жон Ф.Кеннедигийн үхлийн талаар хуйвалдааны маш олон онол гарсан байдаг.
Мөн Трампийн тооцоолж буйгаар нэмэлт 80 мянган хуудас бүхий мэдээлэл тун удахгүй дэлгэгдэх юм байна. Дашрамд дурдахад, сүүлийн арав гаруй жилийн хугацаанд Жон Ф.Кеннедигийн аллагатай холбоотой хэдэн мянган баримт бичгийг үе үеийн эрх баригчид дэлгэсэн байдаг.
Гэхдээ энэхүү үйл явц нь урт хугацаа шаардагдана гэж мэдээлсэн байна. Виржиниагийн их сургуулийн Улс төрийн төвийн захирал, “Кеннеди хагас зуун” номын зохиолч Ларри Ж.Сабато хэлэхдээ, “Бидэнд удаан хугацаанд хийх ажил их байгаа. Тиймээс хүмүүс үүнийг хүлээн зөвшөөрөх хэрэгтэй” гэсэн юм.
