Дэлхийн хамгийн том дижитал камерыг Чилид суурилуулжээ
Дэлхий дээрх хамгийн том дижитал камер болох LSST-ыг (Legacy Survey of Space and Time) Чилийн Серро-Пачон ууланд орших Вера Рубины нэрэмжит одон орон судлалын төвийн “Simonyi” сансрын дуран авайд суурилуулжээ.
Алс холын орчлон ертөнцийн анхны зургийг авч эхлэхээс өмнө дурангийн сүүлчийн туршилтыг хийжээ. 3 тн гаруй жинтэй, 3200 мегапикселийн нягтралтай уг камерыг “Simonyi” дуран авайд суурилуулах ажил олон жил үргэлжилсэн бөгөөд дэлхийн дэлхийн өнцөг булан бүрээс ирсэн эрдэмтэн, инженерүүд оролцсон байна.
“Энэ бол шинжлэх ухаан, технологийн салбарын хувьд ялгуусан амжилт юм” гэж АНУ-ын Эрчим хүчний яамны Шинжлэх ухааны газрын дарга Харриет Кунг онцолжээ.
“Legacy Survey of Space and Time” төслийн хүрээнд туршилт дууссаны дараа шинэ камераар дэлхийн өмнөд хэсгийн тэнгэрийн зургийг авч эхэлнэ. Уг камераар маш дэлгэрэнгүй зураг авах бөгөөд тэдгээрийг харуулахын тулд өндөр нарийвчлалтай 400 ширхэг телевизорыг хананд байрлуулах шаардлагатай болно. Эдгээр мэдээллийг эрдэмтэд астероид, сүүлт од, лугшуур одод болон сансрын үзэгдлүүдийг судлахад ашиглах ажээ.
