Нохой нь эзнээ буудаж шархдуулсан ховор тохиолдол
АНУ-д саяхан нохой нь эзнээ буудаж шархдуулсан ховор хэрэг гарчээ.
Теннеси мужийн Мемфис хотын оршин суугч орондоо унтаж байхдаа буудуулсны улмаас гуяндаа шархдаж, эмнэлэгт хүргэгдсэн байна.
Орео нэртэй, нэг настай питбулл үүлдрийн нохой эзнийхээ унтаж байсан орон дээр үсэрч гарахдаа бууны гохны хамгаалалтыг савраараа цохисноос гох дарагджээ. Цагдаагийн бүртгэлд үүнийг “санамсаргүй осол” гэж дүгнэсэн байна. Гэхдээ ямар төрлийн бууны сум алдагдсан талаар бүртгэлд дурдаагүй өнгөрчээ.
АНУ-д галт зэвсэгтэй холбоотой гэмт хэрэг түгээмэл гардаг ч хүмүүсийг амьтан буудсан тохиолдол ховор байдаг. Хоёр жилийн өмнө Канзас мужид герман овчарк ангийн буун дээр гишгэсний улмаас 30 настай залуу амиа алдаж байжээ.
2018 онд Айова мужид 51 настай эрэгтэй питбулл-лабрадор үүлдрийн эрлийз нохойд “буудуулсны” улмаас хөлдөө шархдаж байв.
