Чихэрлэг хүнсээ хязгаарлах нь эрүүл шүдний үндэс
Амны хөндийн эрүүл ахуйг сахих нь шүд цоорох, буйлны өвчин, эвгүй үнэр үнэртэх болон бусад шүдний өвчлөлөөс урьдчилан сэргийлэхэд тусалдаг. Дийлэнх хүмүүс амны хөндийн эрүүл мэнд нь биеийн ерөнхий эрүүл мэндийн нэгээхэн хэсэг төдийгүй түүнийг тодорхойлох маш чухал ач холбогдолтой зүйл гэдгийг төдийлөн анзаардаггүй. Тиймдээ ч амны хөндийн арчилгааг дутуу дулимаг орхигдуулах нь бий. Шүдний эрүүл ахуй хангалтгүй байх нь зүрхний өвчин, чихрийн шижин, амьсгалын замын халдварт өвчин тусах эрсдэлийг нэмэгдүүлдэг байна.
Тиймээс шүдээ эрүүл байлгах гурван гол зөвлөмжийг хүргэе.
- Чихэр, хүчиллэг хоолыг хязгаарла
Элсэн чихэр нь таны амны хөндийд хортой нянг тэжээж, улмаар шүдний пааланг эвдэж, цооролт үүсгэдэг байна. Хүчиллэг хоол хүнс тэр тусмаа хийжүүлсэн ундаа, кофе зэрэг нь удаан хугацаагаар хэрэглэх явцад планг гэмтээдэг. Эдгээр бүтээгдэхүүнийг хэрэглэсний дараа амаа усаар зайлж хэвших хэрэгтэй. Ус нь хоолны тоосонцор, бактерийг угааж, амны хөндийн хүчлийг саармагжуулж, шүлсний ялгаралтыг дэмждэг. Эслэгээр баялаг жимс ногоо, сүү сүүн бүтээгдэхүүн, үр тариа хэрэглэх нь шүд, буйлны бат бөх байдлыг хадгалахад тусалдаг аж. Чихэрлэг болон хүчиллэг хоолыг тохируулж, тэнцвэртэй хооллолтыг баримталснаар та паалангаа хамгаалж, цоорох эрсдэлийг бууруулж, амны хөндийн эрүүл мэндийг бүхэлд нь дэмжиж чадна.
- Шүдний эрүүл ахуйн үзлэгт тогтмол үзүүлж хэвших
Зургаан сар тутамд шүдний эмчид тогтмол үзүүлэх нь амны хөндийн эрүүл мэндэд чухал үүрэгтэй. Эдгээр тогтмол үзлэг нь шүдний эмч нарт цоорох, буйлны өвчин, амны хөндийн хорт хавдар зэрэг шүдний өвчний эрт үеийн шинж тэмдгийг илрүүлэх боломжийг олгож, цаг алдалгүй эмчлэх, илүү ноцтой өвчнөөс урьдчилан сэргийлэх боломжийг олгодог. Үзлэгийн үеэр мэргэжлийн цэвэрлэгээ хийх нь зөвхөн тогтмол сойз, шүдний утсыг угаах замаар арилгах боломжгүй товруу, шүдний чулууг арилгаж, шүд цоорох, буйлны өвчний эрсдэлийг бууруулдаг байна.
- Шүдний сойзоо зөв сонгох тухай
Шүдний сойз болгон өөр, өөр байдаг байна. Хамгийн сайн шүдний сойзыг сонгохдоо сойзны толгойн хэмжээ, үсний хэлбэр, төрөл, зэргийг анхаарч үзэх хэрэгтэй. Сүүлийн жилүүдэд электрон сойз хэрэглэх хүмүүсийг тоо эрс нэмэгдсэн. Гэхдээ энгийн сойз эсвэл электрон сойз нь хоёулаа таны шүдийг маш сайн цэвэрлэх болно. Шүдний сойзны үс нь олон янз бий. Хэт хатуу сойзоор угаавал шүдний паалан болон буйлаа гэмтээдэг бол, хэт зөөлөн үстэй сойз нь өнгөрийг гүйцэд арилгадаггүй байна. Тиймээс та өөрийн шүд болон амны хөндийн онцлог эрүүл ахуйн байдалдаа тохируулан сойзоо сонгоорой. Эдгээр энгийн аргуудыг дагаж мөрдсөнөөр та шүдний өвчлөлийг эрсдэлийг бууруулж чадна.
