Хиймэл булчинтай хүн төрөлхтөний хувьсгалт робот: Clone Robotics Clone Alpha
Роботехникийн салбарын анхдагч компани болох Clone Robotics саяхан хүний биеийн нарийн ширийн зүйлийг хуулбарлах зориулалттай хиймэл эрхтэн системээр ажиллах Clone Alpha хэмээх хүн дүрст роботыг танилцууллаа. Энэхүү шинэлэг бүтээл нь Теслагийн Optimus болон figure 01 зэрэг олонд танигдсан роботуудтай хүчтэй өрсөлдөж хүн дүрст роботын зах зээлд хүчтэй тоглогч гэдгээ харууллаа.
Clone Alpha нь араг яс, булчин, судас, мэдрэлийн систем зэрэг синтетик эрхтэн тогтолцоог агуулсан биомиметик архитектураараа бусдаас ялгарсан байна. Роботын Myofibers гэгддэг хиймэл булчингууд нь усны даралтаар агшиж байдаг бол полимер араг яс нь хүний ясны бүтцийг 206 ясны аналогоор дуурайдаг. Нэмж дурдахад 500 ваттын авсаархан насосоор ажилладаг гидравлик “судасны систем” нь роботын хөдөлгөөнийг сайжруулж илүү уян хатан болгож өгсөн байна.
Clone Robotics-ийн мэдээлснээр “Clone Alpha-ийн хувьсгалт хиймэл булчингийн технологи нь робот ердөө 3 грамм материалаас нэг кг хүч гаргаж, 50 миллисекундэд 30%-иар агших боломжтой байдаг” хэмээн тайлбарлажээ. Одоогоор дээд бие нь дангаараа 164 үе мөчний цэгийг агуулдаг бөгөөд гар, бугуй, тохой тус бүрд 26 градусын эргэх чадамжтай байгаа аж.
Clone Robotics нь робот гар, их бие гэх мэт бие даасан бүрэлдэхүүн хэсгүүдийн прототипүүдийг танилцуулсан хэдий ч бүтэн биеийн үйл ажиллагааны үзүүлэн хараахан олон нийтэд ил болоогүй байна. Компанийн гүйцэтгэх захирал Дануш Радхакришнан болон техникийн захирал Лукас Козлик нар тус робот нь янз бүрийн орчинд өдөр тутмын ажлыг гүйцэтгэх чадвартай робот бүтээх чухал алхам гэж үзэж байна.
Clone Robotics компани одоогоор Clone Alpha-ийн анхны 279 үйлдвэрлэлийн нэгжийг нийлүүлэхэд анхаарлаа хандуулж байна. Салбарын шинжээчид Clone Alpha-ийн хүн дүрст робот амжилттай болсон тохиолдолд ажлын байрны нөөцөд ямар нөлөө үзүүлэх тал дээр өндөр хүлээлттэй байгаа аж.
