Netflix болон Hollywood-ийн одууд түймрийн хохирогчдод тусалж байна
АНУ-ын Калифорни мужийн Лос Анжелес хотын эргэн тойронд дэгдсэн хээрийн түймрийн хор уршиг өнөөдөр ч үргэлжилсээр байна. Мөн сүүлийн үеийн мэдээгээр тус хот орчимд дахин түймэр дэгдэж, мужийн хэмжээнд газар авах эрсдэлтэй талаар орон нутгийн гал унтраах албанаас сэрэмжлүүлсэн байна.
Өнгөрсөн долоо хоногийн эхнээс хойш арав гаруй хоног асаж буй хээрийн түймэрт олон арван алдартан үнэтэй, тансаг орд харшаа алдсан талаарх мэдээлэл гарч байсан. Тэгвэл одоо тэдэнтэй адил зовлонд унасан түймрийн хохирогчдод сайхан сэтгэлээр туслах хөдөлгөөнд нэгдэж, бүхий л боломжит хэлбэрээр хандив цуглуулж байна.
Жишээ нь, жүжигчин, дуучин Женнифер Лопез өөрийн хэрэглэдэг хувцаснаас ихэнхийг нь орон гэр, өмсөх хувцасгүй хоцорсон түймрийн хохирогчдод хандивлахаа амласан бол Холливуудын алдарт жүжигчин Леонардо Ди Каприо хохирогчдод туслах аянд нэг сая доллар хандивлажээ.
Ийнхүү хандив өргөж, хохирогчдод туслах төвүүдэд сайн дураараа ажиллах алдартнуудын жагсаалт Бионсе, Ева Лонгориа, Жейми Лий Куртис, Холли Берри, Хунтайж Харри, түүний эхнэр Меган нараар үргэлжилж байна. Түймрийн хохирогчдод туслах аяныг GoFundMe цахим хуудсаар давхар зохион байгуулж, энгийн иргэд ч гэсэн сэтгэлийн дэм үзүүлэх боломж бүрдүүлжээ.
Дуучин Бионсе Лос Анжелесийн түймрийн хохирогчдод туслах санд 2.5 сая доллар хандивлаж, BeyGood нэртэй хувийн дөрөв дэх санг нээн ажиллуулж эхэлжээ. Жүжигчин Ева Лонгориагийн хувьд тэргүүн шугамд ажиллаж буй гал унтраах, тусламжийн ажилтнууд болон хохирогчдод туслах аянд нэгдэж, 50,000 доллар хандивласан байна. Меган болон хунтайж Харри нарын тухайд Пасаденад барйлах тусламжийн төвд зочилж, орон нутгийнхантай уулзаж, сэтгэл санааны дэмжлэг үзүүлснээс гадна хоол хүнс, ус тараах хүмүүнлэгийн ажилд гар бие оролцсон гэнэ. Мөн тэр өдөр жүжигчин Женнифер Гарнер гал сөнөөгчдийг хооллож ундлах, энгийн иргэдийг нүүлгэн шилжүүлэх ажиллагаанд оролцжээ. Өнгөрсөн долоо хоногт хэдэн саяын үнэтэй харшаа алдаад байсан жүжигчин Жейси Лий Куртис хандивын аянд нэгдэж, нэг сая доллар хандивласан байна.
Алдартнуудаас гадна томоохон компаниуд ч гэсэн сайн үйлсэд нэгджээ. Нетфликс, Comcast NBCUniversal компани тус бүр арван сая доллар хандивлахаа амласан байна.
Спортын салбараас хандив, тулсамжийн үйл ажиллагаанд хамгийн идэвхтэй оролцож байгаа нь Лос Анжелес хотын мэргэжлийн спортын 12 багийг нэрлэж болно. “Angel City FC, Angels, Chargers, Clippers, Dodgers, Ducks, Galaxy, Kings, LAFC, Lakers, Rams, Sparks” зэрэг баг Америкийн улаан загалмай нийгэмлэг болон Калифорнийн түймрийн сан, Лос Анжелес хотын Гал унтраах албаны санд найман сая долларын хандив өргөхөө амлажээ.
