iPhone-ын AI шинэчлэл хуурамч мэдээлэл түгээжээ
“Apple” компанийн зүгээс хиймэл оюуныг ашиглан хэрэглэгчдийн мэдэгдлийг нэгтгэн хүргэдэг функц нэвтрүүлсэн билээ. Өнгөрсөн долоо хоногт BBC News агентлагийн мэдээллийг буруу тоймлож, “Британийн дартсын тамирчин Люк Литтлер аварга боллоо” гэх худал мэдэгдлийг хэрэглэгчдэд хүргэжээ. Уг явдал дартсын тэмцээний финалын тоглолт болохоос нэг өдрийн өмнө болсон аж.
“Apple”-ийн зүгээс асуудлыг шийдэхийн тулд шинэчлэлт дээр ажиллаж байгаагаа ВВС-д мэдэгджээ. “Apple Intelligence-ийн функцүүд нь бета хувилбарт байгаа бөгөөд бид хэрэглэгчийн санал хүсэлтийн тусламжтайгаар сайжруулалтыг тасралтгүй хийж байна” хэмээн тус компани нэмж дурдлаа.
BBC-ийн энэхүү мэдээлэл нь Apple Intelligence буруу тоймлосон анхны тохиолдол биш юм. Арваннэгдүгээр сард тус функц нь Израилын Ерөнхий сайд Биньямин Нетаньяхуг баривчилсан тухай буруу мэдээлэл түгээсэн байна.
