2024 онд дэлхийн дахинд өрнөсөн онцлох үйл явдлууд

Өнгөрч буй 2024 онд дэлхийн дахинд өрнөсөн онцлох үйл явдлуудыг тоймлон хүргэж байна.

ШИНЭ ОНЫ ЭХЭНД ЯПОНД БОЛСОН ХҮЧТЭЙ ГАЗАР ХӨДЛӨЛТ

2024 он гарсан эхний өдөр Япон улсын Ишикава мужид 7.6 магнитудын хүчтэй газар хөдөлсөн. Улмаар цүнамигийн түгшүүр хүртэл зарлахад хүрч байв. Энэ нь 2011 оноос хойш болсон хамгийн хүчтэй, их хэмжээний хохиролтой газар хөдлөлт болсон. Үүний улмаас 200 гаруй хүн амиа алдсан юм.

ХААНЫ ГЭР БҮЛИЙН ГИШҮҮД ХОРТ ХАВДАР ТУСАВ

Энэ онд Их Британийн хаан Чарльз болон Уэльсийн гүнж Кэйт нар хорт хавдар туссан. Хааны хувьд гурван сарын турш хавдрын эсрэг эмчилгээ хийлгэж, биеийн байдал нь дээрдсэний дараа хойшлуулаад байсан зарим ажил үүргээ хийж эхэлсэн юм. Харин гүнж Кэйтийн хувьд хэвлийн хөндийн мэс засалд орж, эмнэлэгт хэвтэж байгаа тухай мэдээ гарсан. Тус хагалгааны дараах шинжилгээгээр түүнээс хорт хавдар илэрсэн бөгөөд химийн эмчилгээг мөн эхлүүлсэн юм. Тэрбээр сарын өмнөөс ажил үүргээ гүйцэтгэж эхэлсэн. 

ХҮНИЙ ТАРХИНД АНХ УДАА ЧИП СУУЛГАВ

Тэрбумтан Илон Маскын “Neuralink” компани хүний тархинд чип суулгах мэс ажилбараа амжилттай хийв.“Neuralink” компани уг туршилтаараа хүмүүс бодлоороо компьютер удирдах боломжтой болгохыг зорьсон. Чип суулгаж, дөрвөн мөч нь саажилттай хүмүүс бодлоороо төхөөрөмж удирдахад нь туслах холбоо хамаарлыг судална гэсэн юм. 

УМАРД СОЛОНГОС ХОГТОЙ БӨМБӨЛГҮҮД ӨМНӨД РҮҮ ИЛГЭЭВ

Тавдугаар сараас эхлэн Умард Солонгос Өмнөд рүү хогтой уут дүүжилсэн агаарын бөмбөлгүүдийг илгээсэн. Хаягдал цаас, хуванцар бүхий хог тээвэрлэсэн 2000 гаруй агаарын бөмбөлөг Өмнөдийн газар нутагт унасан. Хариуд нь Өмнөд Солонгосоос хоёр улсын хил орчимд К-поп дуу болон суртал ухуулгын шинжтэй мэдээллийг радиогоор цацаж эхэлсэн. Мөн БНСУ-ын идэвхтнүүд удирдагч Ким Жон Уныг буруушаасан олон зуун мянган ухуулах хуудас, К-поп, К-драма бүхий 5000 USB агуулсан бөмбөлгүүдийг Умард Солонгос руу илгээсэн юм.

МЕКСИК УЛС АНХ УДАА ЭМЭГТЭЙ ЕРӨНХИЙЛӨГЧТЭЙ БОЛОВ

Мексик улсын Ерөнхийлөгчийн сонгууль болж, тус улс түүхэндээ анх удаа эмэгтэй Ерөнхийлөгчтэй болсон. 61 настай, цаг уур судлаач, хотын дарга асан Клаудиа Шэйнбаум сонгогчдын 58.8 хувийг авснаар ялалт байгуулсан юм. Энэ ялалт “Мачо” соёлоороо алдартай, дэлхийн хоёр дахь том католик шашинтай Мексик улсын хувьд онцлох үйл явдал болсон.

33 ДАХЬ УДААГИЙН ЗУНЫ ОЛИМП-ОЛНЫ АНХААРАЛД ӨРТСӨН ТАМИРЧИД

33 дахь удаагийн зуны олимп Францын нийслэл Парис хотноо болж өнгөрсөн. Энэ удаагийн олимпоос АНУ хамгийн олон буюу 126 медаль авч улсуудыг тэргүүлэв. Харин Монгол Улсын тамирчин Б.Баасанхүү жүдогийн 48 кг-ийн жингээс мөнгөн медаль хүртсэн нь манай улсын цор ганц медаль болсон юм. Энэ удаагийн олимпын нээлт анх удаа цэнгэлдэхийн гадна буюу Сена мөрөн дагуу болсон.

Энэ олимпын наадмаар боксын төрөлд хүч үзсэн Алжирын тамирчин Иман Хелиф, буудлагын төрөлд Туркээс оролцсон Юсуф Дикеч, Өмнөд Солонгосын тамирчин Ким Еэ Жи зэрэг тамирчид олны анхааралд өртөж, цахим сүлжээнд ихээхэн шуугиан тарьсан. 

ОЙРХ ДОРНОД ДАХЬ ДАХИН НЭГ МӨРГӨЛДӨӨН

2023 оны төгсгөлд эхэлсэн Израил-Хамасын дайн одоо ч үргэлжилж буй. Энэ хугацаанд Ливаны Хезболла бүлэглэл Палестины Хамас бүлэглэлийг дэмжиж буйгаа илэрхийлэн Израил руу довтолсон бөгөөд дайн эхэлснээс хойш бараг өдөр бүр Израил-Ливаны хил орчимд зэвсэгт мөргөлдөөн болсон юм. Улмаар Израил-Хамасын дайн үргэлжлээд нэг жил болохтой зэрэгцэн Израил-Хезболлагийн хооронд том хэмжээний мөргөлдөөн үүссэн. Есдүгээр сараас хойш талуудын мөргөлдөөний улмаас 1300 гаруй хүн амь үрэгдэж, 17 мянга орчим хүн шархадсан. 

Том хэмжээний довтолгоонууд хоёр сар гаруй үргэлжилсний эцэст Израил-Хезболлагийн хооронд гал зогсоох гэрээг арваннэгдүгээр сарын төгсгөлд баталсан. 

РЕППЕР ДИДДИГИЙН ЭСРЭГ ГОМДЛУУД ЦУВРАВ

Шон “Дидди” Комбс нь Пафф Дадди, ПДидди, Лав гэсэн нэрээр алдаршсан Америкийн реппер, жүжигчин, бизнес эрхлэгчийн эсрэг гомдлууд ар араасаа цуварч, түүнийг нууцууд ил болов. Касси хэмээх тайзны нэрээрээ алдартай, экс найз охин Касандра Вентурагийн бэлгийн болон бие махбодын хүчирхийлэл үйлдсэн гэх шүүхэд гаргасан гомдол нь түүний уналтын эхлэл болсон. Диддиг бэлгийн хүчирхийлэл үйлдсэн гэх хэдэн зуун гомдол шүүхэд ирсэн. Үүний дараа түүнийг баривчилсан бөгөөд шүүх хурал нь 2025.05.05-нд болно.

НОБЕЛЬ 2024: УТГА ЗОХИОЛЫН ШАГНАЛЫГ ХҮРТСЭН АНХНЫ АЗИ ЭМЭГТЭЙ

Жил бүр Нобелийн шагналтуудыг өөр өөрсдийн салбарт оруулсан хувь нэмрийг нь үнэлэн тодруулдаг. Энэ жилийн хувьд утга зохиолын салбарын шагналыг Өмнөд Солонгосын зохиолч Хан Кан хүртсэн нь онцлох үйл явдал болсон юм. Энэ шагналыг хүртэж буй анхны ази эмэгтэй болсон.

1901 оноос эхлэн Нобелийн шагналыг гардуулж эхэлсэн бөгөөд өнөөдрийг хүртэлх хугацаанд тус шагналыг хүртэж буй 18 дахь эмэгтэй Хан Кан зохиолч болсон юм.

УМАРД СОЛОНГОСЫН ЦЭРГҮҮД ОРОСЫН АРМИД НЭГДЭВ

Умард Солонгосын 10 мянга гаруй цэрэг Оросын армид нэгдэж, Орос-Украины дайнд оролцсоныг НАТО, Пентагон болон Өмнөд Солонгосын талуудаас баталсан. Курск мужид Украины цэргүүд анх удаа Умардын цэргүүдтэй байлдсан бөгөөд энэ хугацаанд Умардын 100 гаруй цэрэг амиа алдсан гэдгийг АНУ, Украины талууд мэдэгдсэн юм.

АНУ-ЫН ЕРӨНХИЙЛӨГЧИЙН СОНГУУЛЬ-ТРАМПЫН ХОЁР ДАХЬ ЯЛАЛТ

АНУ-ын Ерөнхийлөгчийн сонгууль арваннэгдүгээр сарын 5-ны өдөр болж, 47 дахь ЕрөнхийлөгчөөрДональд Трамп сонгогдов. Трамп 312 төлөөлөгчийн санал авсан бол Ардчилсан намаас нэр дэвшсэн Камала Харрис 226 санал авсан.

Жо Байден Трамп нар дахин өрсөлдөх байсан ч Байден нэрээ татсанаар Камала Харрис нэр дэвшиж, ширүүхэн өрсөлдөөн бий болно гэсэн хүлээлттэй сонгууль болсон юм.

• Дональд Трамп сонгуулийн сурталчилгааны үеэр буудуулжээ
• Камала Харрис: Ардчиллын гол зарчим нь сонгуульд ялагдсанаа хүлээн зөвшөөрөх
• Цагаач гэр бүлээс анхны өнгөт арьст эмэгтэй Дэд ерөнхийлөгч хүртэлх замнал
• Дональд Трамп дөрвөн жилийн дараа эргэн ирэхдээ юу амласан бэ?

БНСУ-ЫН ЕРӨНХИЙЛӨГЧ ОНЦ БАЙДАЛ ЗАРЛАЖ, БҮРЭН ЭРХЭЭ ТҮДГЭЛЗҮҮЛЭВ

Оны төгсгөлд Өмнөд Солонгосын Ерөнхийлөгч Юн Сок Ёль цэргийн дэглэм тогтоохоор онц байдал зарласан. Энэ нь парламентын гишүүд төдийгүй ард иргэдийн томоохон эсэргүүцэл, шүүмжлэлд өртсөн үйл явдал болсон юм. Дэглэмийг зургаан цагийн дараа цуцалсан ч үр дагаварт нь түүнийг огцруулахыг гишүүдийн олонх дэмжиж одоогоор түүний бүрэн эрхийг түдгэлзүүлээд байна. Түүний цаашид хэрхэх нь одоо Үндсэн хуулийн шүүхийн шийдвэрээс шалтгаална.

СИРИ ДЭХ АССАДЫН ГЭР БҮЛИЙН 50 ГАРУЙ ЖИЛИЙН НОЁРХОЛ НУРАН УНАВ

Арваннэгдүгээр сарын сүүлээр Исламын улс бүлэглэлийн холбоотон Хайат Тахрир аль-Шам бүлэглэлийн тэргүүлэл дор Сирийн босогчид маш богино хугацаанд Алеппо, Хама болон нийслэл Дамаскийг эзлэн авсан. Үүний дараа Ерөнхийлөгч Башал аль-Ассад ОХУ руу дүрвэсэн. Улмаар Сирийн Ерөнхий сайд даваа гарагт засгийн эрх мэдлийг босогчдод шилжүүлэхээ мэдэгдсэн. Гэхдээ Ассад анх удаа ам нээхдээ “Оросыг зорих бодолгүй байсан” гэсэн юм.

БИТКОИНЫ ХАНШ АНХ УДАА $100 МЯНГА ДАВАВ

Биткоины ханш анх удаа 100 мянган ам.доллар давсан нь шинэ дээд түвшин болсон. Биткоины ханш ямар түвшинд байх нь криптовалютын салбарын үнэ цэнийг тодорхойлдог. Ийнхүү өссөнийг АНУ-ын Ерөнхийлөгчийн сонгуульд Дональд Трамп ялсантай холбоотой гэж үзэж буй. Учир нь тэрбээр сонгуулийн өмнө крипто мөнгөний илүү уян хатан зохицуулалт авчрах амлалт өгсөн юм.Мөн сонгуулийн кампанит ажлынхаа үеэр хүмүүст биткоиноо зарахгүй байхыг уриалж, үнэ нь өмнө байгаагүйгээр өснө гэж байв.