Одоо дурдагдах 7 чадварыг та эзэмшсэнээр илүү сонголт өргөн болон харьцангуй өндөр орлоготой болох боломжтой юм. Аливаа ажил тухайн хүнээс хувийн болон техник ур чадварыг хослуулахыг шаардаж байдаг.
Магадгүй та өөрийн боловсрол эсвэл өнгөрсөн ажлын туршлагаасаа ховорхон ур чадварыг бүрэлдүүлсэн байх. Хэрэв та карьераа ахиулах болон ажил мэргэжлийн чиг хандлагаа өөрчлөхийг зорьж байгаа бол өнөө цагт ямар ур чадвар эрэлттэй байх талаар мэдэхэд илүүдэхгүй болов уу.
1. Шүүмжлэх сэтгэлгээ
Энэ нь аливаа дүгнэлтийг гаргахын тулд холбогдох мэдээлэлд дүн шинжилгээ хийж, уялдаа зангилааг нь тайлсны дараа сая нэг шийдэлд хүрэх чадвар юм. Ийм төрлөөр сэтгэдэг хүмүүс аливаа асуудалд илүү гүнзгий эргэцүүлэн бодоход өөрийгөө болон бусдыг уриалж, бүтээгдэхүүн, санаа, бодлогыг сайтар боловсруулдаг.
Ажлын байрны жишээ нь:
- Оюутнуудынхаа онцлогт нийцүүлэн сургалтын хөтөлбөрөө боловсруулдаг багш
- Шийдвэр зөв эсэхийг баталгаажуулахын тулд хурал дээр олон нийтийн санаа бодлыг байнга асуудаг ажилтан
- Үйлдвэрийн ажилчдын аюулгүй байдал, сайн сайхан байдлыг хангахын тулд ажил олгогчдоос чухал асуулт тавьдаг үйлдвэрчний эвлэлийн төлөөлөгч
2. Асуудлыг шийдвэрлэх чадвар
Асуудлыг шийдвэрлэх нь нарийн төвөгтэй эсвэл хэцүү асуудлын шийдлийг олох чадвар юм. Асуудлыг шийддэг чадварлаг хүн асуудлын үндсэн шалтгааныг олж тогтоох, дараа нь түүнийг шийдвэрлэх төлөвлөгөөг хэрэгжүүлэхэд сайн байх магадлалтай.
Асуудлыг шийдвэрлэх чадвар нь олон хэлбэрээр илэрч болно, үүнд:
- Борлуулалтын цэгийн үйл ажиллагаа зогссон үед захиалга авах өөр аргыг хурдан бодож олох кассчин
- Бүртгэлийн илүү үр дүнтэй системийг бий болгодог нягтлан бодогч
- Сонгогчдын хүртээмжийг сайжруулах зорилгоор мэдээллийн сан бүрдүүлдэг улс төрийн компанит ажлын дадлагажигч
3. Дасан зохицох чадвар
Энэ нь аливаа шинэ нөхцөл байдалд хурдан дасан зохицох чадвар юм. Ийм чадвартай хүн танил бус орчинд орж, шинэ сорилтуудтай тулгарсан ч амжилтанд хүрдэг.
Дасан зохицох чадвартай хүн жишээ нь:
- Агуулахын ажилчин, бүтээгдэхүүнээ савлах, бараа материал авах, хүргэлт хийх, ээлжийн хуваарийг тохиролцох зэрэгт илүү тохиромжтой байдаг.
- Жолоочийн хүсэлтэд хурдан хариу өгч, өөр замуудыг санал болгодог диспетчер
- Саяхан ажилд орсон ч, чухал төсөл дээр шуурхай ажиллах мэргэжилтэн
4. Багаар ажиллах чадвар
Багаар ажиллах нь бусадтай сайн ажиллаж, төслийн сайн сайхныг хувийн ашиг сонирхлоос дээгүүр тавих чадвар юм. Багаар ажиллах чадвар сайтай хүн багын найзуудаа дэмжих, бусдыг урамшуулах, бүтээлч санал хүсэлт гаргах, хүлээн авах чадвартай байдаг.
Багаар ажиллах зарим нэг жишээ:
- Тогооч, аяга таваг угаагчийн багтай дарамт шахалт дор, янз бүрийн зан чанарыг эелдэг байдлаар зөөлрүүлж, үйлчлүүлэгчидтэй харьцах зөөгч.
- Байшингаа цагт нь барьж дуусгахын тулд олон хүнтэй хамтран ажиллах барилгачин
5. Нягт нарийн ажиллах чадвар
Энэ нь тухайн нэг төслийн нарийн ширийн зүйлийг чанарын хувьд баталгаажуулах чадвар юм. Нарийвчилсан зүйлд анхаарлаа хандуулдаг хүн төсөл эсвэл бүтээгдэхүүний бусад олон хүмүүсийн үл тоомсорлож болох чухал талуудад анхаарлаа төвлөрүүлж чаддаг.
Хариуцсан ажилдаа нягт нарийн хандах чадварын жишээнд:
- Шаазан эдлэлийн үйлдвэрийн ажилчин хавтан бүрийн өнгөлгөө, хэмжээ, хэлбэр, материалын согогийг шалгаж чанарыг нь баталгаажуулдаг.
- Санхүүгийн бүх бүртгэлийг эмх цэгцтэй байлгахын тулд компанийн дансыг мөр мөрөөр нь хянуулдаг зуршилтай нягтлан бодогч
- Үг, үсгийн болон найруулгын алдааг нэгд нэгэнгүй засахын тулд эх бичвэрийг эхнээс нь дуустал уншдаг редактор.
6. Зохион байгуулах чадвар
Энэ нь цаг хугацаа, төлөвлөгөө гэх мэт бусад хүмүүс болон үйл явцыг үр дүнтэй зохицуулах чадвар юм. Мөн тэд багийн гишүүн бүр өөрсдийнхөө хэрэгжүүлж буй төслийн талаар илүү том дүр зурагтай хэрхэн нийцэж буйг ойлгох чадвартай байх магадлалтай.
Амьдрал дээрх цөөн хэдэн жишээ:
- Амьд тоглолтын үеэр бүх зүйлийг жигд явуулах үүрэгтэй тайзны менежер
- Гэр бүлийнхээ өмнө хүлээсэн хариуцлагаа төлөвлөх, зохицуулах ёстой эцэг, эх
- Клубын уулзалтыг тогтмол зохион байгуулж, хэлэлцүүлэг өрнүүлж, үйл ажиллагааг төлөвлөдөг клубын ерөнхийлөгч
7. Агуулга үүсгэх, удирдах
Агуулга бий болгох, удирдах ур чадвар нь маркетингийн карьерт чухал үүрэг гүйцэтгэдэг. Энэхүү ур чадвар нь бүтээлч байдал, өвөрмөц байдал, нийгмийн сэтгэл зүй, сэтгэл хөдлөлийн илэрхийллийг тусгасан байдаг.
Жишээ болгох ажлын байр гэвэл:
- Сошиал медиа менежер
- Дижитал маркетингийн менежер
- Контент маркетингийн менежер
- Брэнд маркетингийн менежер
